Asteazkena, 2013ko ekainak 19 - 03:16
HONDAKINAK
Gipuzkoako Diputazioak, Ikastolen Elkarteak, Kristau Eskolek eta Aranzadik sinatu dute hitzarmena. Herrialdeko hondakinen kudeaketak etorkizun oparoa izatea da helburua.
Jon Eskudero 2012-10-10 - 13:49:52
Bozkatu
Zero Zabor programa bat eskoletan lantzeko hitzarmena sinatu dute Gipuzkoako Foru Aldundiak, Kristau Eskolek, Ikastolen Elkarteak eta Aranzadi zientzia elkarteak. Gipuzkoako Diputazioan elkartu dira lau aldeetako ordezkariak: Martin Garitano ahaldun nagusia, Mikel Ormazabal Kristau Eskola elkarteko zuzendariordea, Koldo Tellitu Ikastolen Elkarteko lehendakaria eta Francisco Etxeberria Aranzadiko lehendakaria.
Helburua da Gipuzkoako hondakinen kudeaketak etorkizun oparoa izatea. Garitano: "Hitzarmenak agerian uzten du jendarteak gero eta kontzientzia handiagoa daukala hondakinen arazoari irtenbidea emateko, eta lanean segi behar dugu". Hitzarmenak funtsezko arlo bati eragiten diola nabarmendu du ahaldun nagusiak: hezkuntzari.
Bost zeregin zehatz izango ditu programak: hezkuntza eragileekin harremana izatea, sekuentzia didaktikoa eta hezkuntza materiala osatzea, eskoletan jarduerak eta tailerrak egitea, eskoletan esperientzia pilotuak gauzatzea eta sentsibilizazio jarduera planak osatzea. Aranzadi zientzia elkarteak zuzendu eta kudeatuko du programa, eta gainontzeko elkarteak lankidetza estuan arituko dira.
