INDIA

Hizkuntzak: Indian bi hizkuntza ofizial daude, eta 22 hizkuntza nazional, guztiak ere Konstituzioak ezagutuak. Ingeles (administrazioko hizkuntza ofiziala; 'lingua franca'), hindi (ofiziala, %30). Hizkuntza nazionalak: bengalera (70 m.), telugu (66 m.), marathera (63 m.), tamilera (53 m.), urdu (43 m.), gujaratera (41 m.), kannada (33 m.), malabarera edo malajalam (30 m.), odia (lehen, oriya; 28 m.), punjabera (23 m.), assamera (13 m.), maithili (8 m.), sindhi (2,1 m.), konkanera (1,7 m.), manipurera (1,2 m.), nepalera (1 m.), kaxmirera (0,5 m.), sanskrito (0,5 m.), santalera, dograera / dogri, bodoera. Indian beste hainbat mintzaira ere badago (eskualde mintzairak), hiztun asko dituztenak batzuk: bhojpurera, awadhiera, haryanavi, marwarera, chhattisgarhera, magadhera, angika, bhilera, gondera, hindustanera, kodava, kutchera...
Biztanleak: 1.300 milioi (NBE, 2012). Indian 4.000 talde etniko baino gehiago daude. Oro har, honako talde hauetan banatzen dira: indoario (%72), dravida (%25), mongoloide eta beste (%3; negrito, australoide...).
Erlijioak: hindu (%80,5), musulman (%13,4), kristau (%2,3), sikh (%1,8), budista (%0,7), jainista (%0,4) eta beste.
Transkripzioak: izen gehienak ingelesezko eran daude zabalduak nazioartean, eta horiek erabiliko ditugu.
 

INDONESIA

Hizkuntzak: indonesiera (malaysieraren era estandarra, ofiziala), ingeles, nederlandera, eta beste hainbat hizkuntza eta dialekto: javera, sundera, madurera, minangkabauera, baliera, batakera...
Biztanleak: 242,8 milioi (NBE, 2012). Indonesian 300 talde etniko inguru daude. Javar (%45), sundar (%14), madurar (%7,5), malaiar (%7,5), eta beste hainbat (%26; batak, minangkabau, betawi, bugi, banjar, balitar, sasak...).
Erlijioak: musulman (%88), protestante (%5), katoliko (%3), hindu (%2), budista (%1).
Jakingarriak: muga arazoak daude. 1975etik, Indonesiak okupatua izan zuen Ekialdeko Timor (kolonia portugaldarra izanikoa). 1999an, Ekialdeko Timorren independentzia onartu zuen, eta herrialde hori independentea da erabat 2002. urteaz geroztik. Bestalde, Aceh eta Papuan mugimendu independentistak daude.
 

Ingalaterra

Hizkuntzak: Ingelesa da, 'de facto', hizkuntza ofiziala. Beste hainbat mintzaira ere badira, hainbat talde etnikok erabiliak: bengalera, kantonera, hindi, punjabera, urdu, kreolera, jamaikera. Kornuallesen, 3.500 lagun kornubieraz mintzo dira.
Biztanleak: 50,7 milioi. Zuri (%89,1), Asiako hegoaldeko (%5,30), beltz (%2,69), mestizo (%1,57), txinatar (%0,70), beste (%0,60).
Erlijioak: protestante (%78), katoliko (%11) eta beste (%11).
 

Inguxetia

Hizkuntzak: errusiera, inguxera (biak dira ofizialak).
Biztanleak: 413.000 lagun (2010eko errolda). 78 talde etniko daude Inguxetiako Errepublikan. Ingux (%77; 361.057), txetxen (%20,4; 95.403), errusiar (%1,19; 5.559), turkiar (%0,2; 903).
Erlijioak: inguxak musulman sunitak dira nagusiki.
Jakingarriak: Errusiako errepublika autonomoa, Txetxen-Inguxen errepublika zatitu zenean sortua.
Transkripzioak: izen bereziak idazteko, ikus zirilikotik transkribatzeko taula.
 

Ipar Irlanda

Hizkuntzak: ingeles, gaeliko (gaeilge; gutxiengo txiki bat besterik ez da mintzo, 170.000 lagun inguru), eskoziera. Gaelikoa ia galdu da, eta ez du batere ofizialtasunik.
Biztanleak: 1,6 milioi.
Erlijioak: katoliko (%40,3), protestante (%36), beste (%9,9), zehaztugabe (%9), sinesgabe (%9).
Jakingarriak: Irlandako Errepublika estatu burujabea da, eta Ipar Irlanda britainiarren agindupekoa da. Uharte osoaz mintzatzeko, Irlanda aipatzen da. Loialista britainiarrek Ulster erabiltzen dute Ipar Irlanda soilik adierazteko, baina Ulster eskualde bat da, eta Irlandako Errepublikaren zati bat ere hartzen du.
Transkripzioak: ingelesezko toponimoak erabiliko ditugu. Dena dela, hizkuntzari buruzko artikuluetan, gaelikozkoak ere idatziko ditugu, parentesi artean.
 

IPAR KOREA

Hizkuntzak: koreera.
Biztanleak: 24,5 milioi (NBE, 2012). Korear. Txinatar eta japoniar gutxiengo oso txikiak ere badira.
Erlijioak: tradizioz, budista eta konfuzianistak dira korearrak. Kristau batzuk badaude, chondogyo sinkretistak ere bai.
Transkripzioak: nazioartean finkaturiko erak erabiliko ditugu. Koreako pertsona izenek bi zati izaten dituzte: lehenbizikoa abizena da (familiako patronimikoa), eta bigarrena, izen pertsonala. Bigarren aipamenean, aski da abizena. Esaterako: 'Ban Ki-moon' aurrena aipatzen dugunean, eta 'Ban' hortik aurrera.
 

Ipar Marianak

Hizkuntzak: ingeles (%10,8), txamorro (%22,4), carolin (3.000 hiztun); hiru hizkuntza horiek dira ofizialak. Tagalo edo filipinera (%24,4; 'de facto' ofiziala da), txinera (%23,4), eta beste (%9,6).
Biztanleak: 63.500 lagun (NBE, 2011). Filipinar (%29 inguru), txinatar (%22,1), cahamorro (%21,3), carolindar eta bestelako mikronesiar, kaukasoar, japoniar, korear.
Erlijioak: kristau (katolikoak nagusiki). Sinesmen tradizionalak ere badira.
Jakingarriak: Ozeano Bareko uharte multzo estatubatuarra. Administrazio independentea du.
 

Ipar Osetia

Jakingarriak: Ikus Ipar Osetia-Alania.
 

Ipar Osetia-Alania

Hizkuntzak: osetiera eta errusiera dira ofizialak. 500.000 lagun inguru mintzatzen dira osetieraz, eta horietako %60 Ipar Osetia-Alanian bizi dira (%15 Hego Osetian).
Biztanleak: 712.877 lagun (2010). Osetiar (%53), errusiar (%30), ingux (%5), armeniar (%2).
Erlijioak: osetiarrak kristau ortodoxoak dira nagusiki. Gutxiengo musulmana ere badago.
Jakingarriak: lehen, Alania. Errusiako errepublika autonomoa da.
Transkripzioak: izen bereziak idazteko, ikus zirilikotik transkribatzeko taula.
 

IRAK

Hizkuntzak: arabiera (%75) eta kurduera dira hizkuntza ofizialak. Turkomanera eta asiriera eskualde hizkuntza gisa onartuak daude. Armeniera, persiera...
Biztanleak: 33,7 milioi (NBE, 2012). Arabiar (%75-80), kurdu (%10-12), asiriar (%10-12), beste (%5; turkmen, siriar, irandar, lur, armeniar, mandear). Irakeko ipar-ekialdea Kurdistanen parte da (ikus Iran eta Turkia), eta Kurdistan eskualde autonomo izendatzen du Irakeko Konstituzioak. Hori gogoratzea komeni da han jatorria duten informazioetan. Hona hemen Iraken mendeko Kurdistango zenbait hiri: Dahuk, Halabja, Arbil, Kirkuk, Mosul, Sulaimaniya, Zakhu.
Erlijioak: musulman (%97; xiita %60-65, sunita %32-37), kristau eta beste (%5).
Transkripzioak: izen bereziak idazteko, ikus alfabeto arabiarretik eta perso-arabiarretik transkribatzeko taula.
 

IRAN

Hizkuntzak: persiera (ofiziala, %58), turkiar hizkuntzak (%26), kurduera (%9), lurera (%2), balutxera (%1), arabiera (%1), turkiera (%1), beste (%2; gileki edo gilandera, mazandarandera...).
Biztanleak: 75,6 milioi (NBE, 2012). Persiar (%51), azeriar (%24), gilandar eta mazandarandar (%8), kurdu (%7), arabiar (%3), balutx (%2), lur (%2), turkmen (%2) eta beste (%1). Irango ipar-mendebaldea Kurdistanen parte da (Mendebaldeko Azerbaijan, Kurdistan, Kermanxah eta Ilam probintziek osatzen dute Iraken mendeko Kurdistan; ez nahastu, beraz, Kurdistan herrialdea eta Irango Kurdistan probintzia). Hori gogoratzea komeni da han jatorria duten informazioetan. Hona hemen Irakeko Kurdistango zenbait hiri: Sinne (persieraz, Sanandaj), Marivan, Bane, Saqqez, Qorveh, Bijar, Kamiaran, Mahabad, Urmia, Sardaxt.
Erlijioak: musulman xiita (%89), musulman sunita (%9). Beste gutxiengo batzuk ere badaude: judu, kristau, zoroastrista (hiru horiek ofizialki onartuak daude, eta Parlamentuan leku bat gordetzen diete horien ordezkariei), bahaista.
Transkripzioak: izen bereziak idazteko, ikus alfabeto arabiarretik eta perso-arabiarretik transkribatzeko taula.
 

IRLANDA

Hizkuntzak: Irlandako Errepublika: irlandera, edo Irlandako gaeliko edo gaelera (gaeilge esaten diote gaelikoz; Irlandako Gobernuaren arabera, 1.570.894 lagun dira gaelikoz hitz egiteko gai, eta 339.541 irlandarrek erabiltzen dute egunero; erabiltzaile gehien eskualde gaelikoan du, Gaeltacht izenekoan), ingeles (bigarren hizkuntza ofiziala, baina 'de facto' nagusia). Ipar Irlanda: ingeles, gaeliko (gaeilge; gutxiengo txiki bat besterik ez da mintzo, 170.000 lagun inguru), eskoziera; Irlandako gaelikoa ia galdu da, eta ez du batere ofizialtasunik.
Biztanleak: 6,2 milioi. Irlandako Errepublika: 4,6 milioi (NBE, 2012). Ipar Irlanda: 1,6 milioi.
Erlijioak: Irlandako Errepublika: katoliko (%88,4), Irlandako Eliza (%3), bestelako kristau (%1,6), beste (%1,5), zehaztugabe (%2), sinesgabe (%3,5). Ipar Irlanda: katoliko (%40,3), protestante (%36), beste (%9,9), zehaztugabe (%9), sinesgabe (%9).
Jakingarriak: Irlandako uhartea bi egitura administratibotan banatua dago: Irlandako Errepublika (Hego Irlanda) eta Ipar Irlanda. Irlandako Errepublika estatu burujabea da, eta Ipar Irlanda britainiarren agindupekoa da. Loialista britainiarrek Ulster erabiltzen dute Ipar Irlanda soilik adierazteko, baina Ulster eskualde bat da, eta Irlandako Errepublikaren zati bat ere hartzen du.
Transkripzioak: Irlandako toponimoak ingelesez idatziko ditugu. Dena dela, hizkuntzari buruzko artikuluetan, gaelikozkoak ere idatziko ditugu, parentesi artean.
 

ISLANDIA

Hizkuntzak: islandiera, ingeles, hizkuntza eskandinaviarrak (daniera eta beste), aleman.
Biztanleak: 328.000 lagun (NBE, 2012). Islandiar (%94; norvegiarren eta zelten arteko nahasketaren ondorengoak), beste (%6).
Erlijioak: Islandiako Eliza luteranoa (%85,5,), Reykjavikeko Eliza luterano librea (%2,1), katoliko (%2), Hafnarfjorurko Eliza luterano librea (%1,5), bestelako kristau (%2,7), beste edo zehaztugabe (%3,8), afiliaziorik gabe (%2,4).
 

ISRAEL

Hizkuntzak: hebreera (ofiziala), arabiera (estatus berezia), ingeles.
Biztanleak: 7,7 milioi (NBE, 2012). Judu (%80,8), arabiar (%19,2).
Erlijioak: judu (%76,5), musulman (%15,9), kristau (%2,1), druso (%1,6), zehaztugabe (%3,9).
Jakingarriak: hauek dira lurralde okupatuak: Zisjordania, Jerusalem ekialdea, Gaza eta Golan. Denak ere 1967an hartu zituen Israelek, Sei Eguneko Gerran. 1982an, Libano hegoaldean ere okupatu zuen lurralde bat, 'segurtasun eremua' deitua, baina 2000. urtean alde egin zuen handik. 2005ean, hustu egin zituen Gazako kokagune juduak.
Transkripzioak: izen gehienak ingelesezko eran daude zabalduak nazioartean, eta horiek erabiliko ditugu.
 

ITALIA

Hizkuntzak: italiera; zenbait gutxiengoren hizkuntzek ere badute ezagutza ofiziala eskualde batzuetan: alemana, frantsesa, sardiniera, friulera, ladinera, okzitaniera, esloveniera, erromani, tirolera, grekoa, katalana, kroaziera...
Biztanleak: 61 milioi (NBE, 2012). Italiar, zenbait gutxiengo (aleman, frantses, esloveniar-italiar, albaniar-italiar, greko-italiar...).
Erlijioak: batez ere katoliko. Protestante eta judu komunitateak badira, aspalditik datozenak. Musulmanak gero eta gehiago dira, etorkinen artean batik bat.
Jakingarriak: Eslovenia historikoak Italiaren zati bat hartzen du, baita Okzitaniak ere beste zati bat. Italiaren barruan estaturik gabeko nazio batzuk ere badaude. Ikus Sardinia, Friuli eta Hego Tirol.