Ezkerreko bozak lau hautagaien artean banatuko dira

Michel Arhanzet kontseilariak aukera guztiak dauzka hauteskundeak lehen itzulitik irabazteko, azken aldian bezala

Eneko Bidegain - BAIONA

Ontsalaz, Michel Arhanzet kontseilari nagusiak lehen itzulian irabaziko ditu hauteskunde horiek. Atharratzeko kantonamendua jendez husten ari da urtetik urtera, eta hori da kanpainaren ardatz nagusietarikoa, laborantza nola mantendu eta industria nola berpiztu gogoetatzearekin batera. Bakoitza bere proposamenekin aurkezten da. Ezkerretik lau hautagai lehiatuko dira, duela sei urte bi baizik ez zirelarik.

AB eta PCFko hautagaien artean bozen %37 lortu zituzten, gehienak komunistarentzat joan zirelarik. Aurten abertzale bakarra badago ere, ezkerrean hiru hautagai daude. Komunistaz gain, sozialista bat ere badago. Horrek orduko hautagai komunistaren bozetatik zati bat bil lezake. Haatik, zama bat dauka bizkar gainean : kantonamenduan ez dela batere ezagutua. Louis Labadot Zuberoako komunismoaren aurpegi ezaguna da, nahiz eta lehen aldikotz aurkezten den Atharratzeko kantonamenduan eta, berez, Maulekoa den.

Komunisten eta abertzaleen artean, auzapez bat

Boz komunistaren bertze zati bat Ruben Gomez Liginagako auzapezari joanen zaio. Alderdi komunistako kide ohi honek nahiago du independente jarraitu. Nahiko ezaguna da kantonamenduan eta kantonamendutik kanpo. Abertzaleen boz batzuk ere bil ditzake, franko irekia baita ideia abertzaleetara. Udalbiltzak bultzatu zuen Zuberoa Garatzen ekimenan parte hartu zuen.

Jean-Dominque Iriart da hautagai abertzale bakarra. Ezker abertzaleko plataformaren izenean aurkezten da. Haatik, ABk ez dio sostengu ofizialik ekarri, hautagaitzak ez baitu bat egin alderdi horrek aurkeztu agiriarekin. Horiek hola izanagatik, kantonamenduko abertzale guzien bozak lortuz gero, duela sei urte Jakes Sarrailletek bilduak gaindituko dituen ikusi beharko da.
Iriart duela hamabi urte aurkeztu zen hauteskunde horietan. Orduan 128 boz bildu zituen (%4,99). Sei urte berantago, abertzaleen boza 172ra igo zen. Populazioaren apaltzeak boz abertzaleen apaltzea eraginen ote du? Kopurua mantentzea bera lorpena litzateke.