Domerguek postua mantendu ahal izanen du

Eskuineko hautagaiak ez dauka eskuineko aurkari sendorik eta ez da ezkerreko gunea

E.B. - Baiona

Jean-Louis Domergue kontseilari nagusi izanen da bertze sei urterentzat, alimaleko ustekaberik ez bada gertatzen. Baiona mendebaldeko kantonamenduan eskuina nagusi da. Domergue UDFkoak ez dauka lehiakide sendorik eskuinean. Boz batzuk ken diezaizkiokeena Denis Brillant da, Elgar-ensemble alderdiaren hautagaia. Bere burua zentro eskuinean kokatzen du eta pertsona ezaguna da Baionan, harakin eta enpresaburu gisa bereziki. Zergak ez igotzea galdegiten du, Batera-ren lau aldarrikapenetaz aparte.

Brillantek Jean Grenet Baionako auzapez eta diputatua sostengatzen du. Domergue, ordea, Greneten aurka aurkeztu zen, duela bederetzi urteko udal hauteskundeetan. Geroztik auzapezarekin baketu da, baina eskuineko sentsibilitate guztiek ez dute baitezpada oraingo kontseilari nagusiaren alde bozkatuko lehen itzulian.

Brillantek nekez kenduko dizkie bozak hautagai abertzaleei, nahiz eta euskaltzaletasuna agertu. Abertzaleen bozak ez dira asko eta ABko Jakes Bortairuk duela sei urte lortu zituenetatik zenbat Miren Idoaterengana (Baiona Iraultzen) joanen diren argitu beharko da. Haatik galdera bat airean gelditzen da: lehen aldikotz abertzale bozkatzera anima zitezkeen batzuen bozen zati bat ez ote da Brillantengana pasatuko?

Kontuan hartzeko bertze datu bat abstentzioa izanen da. Azkenaldian ia %50ekoa zen eta hori izan daiteke Domergue pixka bat ahul lezakeena, bigarren itzulia arte bederen.