Leopold Darritxonek aulkia berreskuratzeko helburua du

Bastidako auzapez eta kontseilari ohiak Jean Castaingsi lekua kendu nahi dio

ENEKO BIDEGAIAN - BAIONA

Baxenabarreren eta Lapurdiren artean dagoen kantonamendua da Bastidakoa, hegal bat barnealdeari begira, bertzea hiriari. Kantonamenduko bi herri nagusiak Lapurdin daude.

Beskoitzek 2.044 biztanle dauzka, eta Ahurtin 1.758 bizi dira. Ahurtiko auzapeza da azken sei urteetako kontseilari nagusia. Jean Castaingsek, duela sei urte, Leopold Darritxon Bastidako auzapez eta ordu arteko kontseilari nagusiaren aulkia berreskuratu zuen duela hamabi urte galdu ondoan. Baina bigarren itzuliko bozen %38,36rekin bakarrik.

Jean Falagan Beskoitzeko auzapeza bigarren itzulitik erretiratu izan balitz, menturaz Darritxon nagusituko zitzaion Ahurtikoari. Darritxonek bozen %33,89 eskuratu zituen, eta Falaganek %27,74.

Aldi honetan, etiketak aldatuko dira. 1992an bozak independente gisa irabazi zituen Darritxon ez da gehiago, 1998an bezala, RPR-UDF etiketarekin aurkeztuko, eta Castaings ez da gehiago independentea. Aldi honetan, orain arteko kontseilari nagusiak dauka UMPren babesa. Darritxon, ordea, alderdi politiko berri baten izenean aurkeztuko da, Elgar-ensembleren izenean. Batera-ren aldarrikapenekin bat egiten duen alderdi ez-abertzale, ez-eskuindar, ez-ezkertiar horren etiketak mesede eginen dion ala kalte ikusi beharko da. Kalte egin diezaioke Frantziako Gobernuaren eta Pirineo Atlantikoetako gehiengoaren etiketa orain arteko kontseilari nagusiak hartu izanak. Azken urteetako kontseilari nagusi izate hutsak berak abantaila handia ekar diezaioke ahurtiarrari.

Darritxonek, bere aurkezpenan, Castaingsen sei urteko bilana kritikatu zuen. Ez zuen argudio politikoetatik abiatu kanpaina. Castaingsi bere kantonamenduaren alde lanik ez egin izana leporatzen dio. Besteak beste, errepideen egoera aipatu zuen. «2005eko Tourra Bastidako kantonamendutik iragan dadin galdeginen dut, errepideak hobetu ditzaten», adierazi zuen.

Aulkiaren berreskuratzeko daukan motibazioak eta hauteskunde hauek Castaingsen eta Darritxonen lehia gisa kokatzeak ez du bertze hautagaien itzala gutietsiarazi behar. Darritxon biziki ezaguna bada ere Bastida herrian, duela sei urte 203 boz baizik ez zituen eskuratu Beskoitzen. Jean Falagan Beskoitzeko auzapeza ez aurkezteak kopuru horren igotzeko aukera bat eman diezaioke. Baina azken sei urteetan populazioa anitz emendatu da herri horretan. Biztanle berrien bozak, boz berriak nork eskuratuko dituen inork ez dezake erran. Darritxonentzat oztopo izan daitezke. Falaganen 535 bozen eta boz berrien zati bat PSren hautagaiak eskura ditzake. Jean Thikoipe ABko hautagai eta Beskoitzeko auzapezordeak ere badu bertze zati baten lortzeko parada. Horri duela sei urteko hautagai abertzalearen bozen zati bat gehitzen bazaio (kontuan hartuz Anita Parachu Batasunak sostengatzen duen Herria Eraiki plataformako hautagaiak ere boz batzuk eskuratuko dituela); Thikoipek ere zaildu diezaioke Darritxoni bigarren itzulirako txartela, Castaingsek ez badu lehen itzulitik gehiengo osoa lortzen.