Musika jaialdirik nahi ez duen kontseilaria kanporatu nahian

Jacques Coumetek 31 urte bete ditu Kontseilu Nagusian, eta beste sei urtetarako aurkeztu da hauteskundeotan

ENEKO BIDEGAIAN - BAIONA

Hazparneko Mixel Intxauspe. Jacques Coumeti ez zaio urte anitz falta Garaziko kontseilari nagusiaren markara heltzeko. 31 urte bete ditu Pirinio Atlantikoetako Kontseilu Nagusian eta bertze sei urtetarako abiatu nahi du. Garai batez Intxausperen gisa, orain arte hauteskundeak lehen itzulitik irabazi izan ditu. Aitzineko aldian, hautesleen %63k bozkatu zuten haren alde eta sei urte lehenago ere bai.

Aurten ohi baino aurkari gehiago izanen du parean eta lehen itzulitik irabazteko aukerak pixka bat mugatu zaizkio. Beñat Intxauspe (ez du deus ikustekorik Michel Intxausperekin) eta Xabi Larrek Coumeten eremutik hartuko dituzte bozak, hein handi batean. Biak zentroan kokatzen dira, lehena independente gisa, bigarrena Elgar-ensembe alderdiaren izenean. Coumetek zentroko eta eskuineko bozak bereganatzen zituela kontuan hartuz, Coumeten alternatiba izan nahi luketenen itzalak ahuldu lezake.

Martxoaren 21ean neurtuko du, menturaz, Euskal Herria Zuzenean jaialdia bere herrian antolatzea debekatzeak boz gehiago ekarriko dion edo ez. Larre eta Intxauspe ez dira busti. Publikoki ez dute salatu Coumeten jarrera. Argi da Hazparneko belaunaldi gazteek biziki begi txarrez ikusten dutela musika jaialdiaren debekatzea. Coumetek, hain segur, belaunaldi zaharrenei begira hartu du erabakia. Boz batzuk mehatxatuak ikusten zituelako eta horien mantentzeko xedez?

Coumetekin arrazoi horrengatik haserre daudenen bozak ez dira baitezpada Larre edo Intxausperengana joanen, hauek erakutsi jarreraren ondotik. Larrek abertzale batzuek bozak eskuratzeko esperantza izan lezake, baina abertzaleek jaialdiaren inguruan jarrera argi eta garbirik ez erakutsi izana leporatu liezaiokete.

Abertzaleek Larreri barkatuko ez diotena duela hiru urteko herriko bozetan erakutsi jarrera da. Lehen itzulian Larreren zerrenda bigarren postuan heldu zen, Coumeten gibeletik. Bigarren itzulirako, abertzaleen zerrendatik kide batzuk onartu izan balitu, abertzaleen babesarekin Hazparneko auzapez kargua lortuko zuen. Ukaldi gogorra izan zitekeen Coumetentzat. Baina ez zuenez halako traturik onartu, Coumet nagusitu zen, 24 bozengatik bakarrik.

Bozka abertzalea hiruren artean Hazparnen

Larreren orduko hautua zintzurrean trebeska daukate oraino Hazparneko abertzaleek. Beraz, bozka abertzalea, hain segur, hiru hautagairen artean banatuko da eta ez lauren artean. Kako Saint-Esteben aurkeztuko da ABren izenean. Xarlo Etxezaharreta Segi aitzina plataformaren izenean aurkeztuko da eta Manex Pagola EArentzat.

Abertzaleek emaitza onak lortu izan dituzte azken bi kantonaletan. Xarlo Etxezaharretak %19,63 lortu zuen duela sei urte eta Dani Camblongek %27,50 sei urte lehenago. Bi kopuru horien artean ibil daiteke abertzaleen boz kopurua. Ikusi behar da Berdeak, PS eta PCFen artean batu ohi diren %7en bozak nora joanen diren, aurten horietarik inor ez dela aurkezten jakinda.

Dena den, galdera ikur handia hiru abertzaleen arteko bozak nola banatuko diren jakitean datza. Batasuna eta ABren zatiketaren ondotik nork zer babes duen jakiteaz gainera, Etxezaharreta presoarekiko elkartasun boza zenbatekoa izanen den ikusi beharko da.

Horrek abertzaleen barne neurketarako balioko du. Hauteskunde hauetako erronka hiru urteren buruko herriko bozei begira kokatzen da. Lehen itzulian bigarren helduko denak abantail eta sinesgarritasun handia izanen du Coumeten kontrako zerrenda kudeatzeko. Intxauspe eta Larreren arteko lehiak badu garrantzia, beraz, ustekaberik ezean.

Eta abertzaleak baturik baleude, Coumeten gibeletik eta besteen aitzinetik heltzeko asmoa balute.