Bederatzi lagun lehian Miarritzen, eskuinaren erresuman

Max Brissonek kontseilari nagusi jarraitzeko aukera guztiak bere alde dauzka

Eneko Bidegain - BAIONA

Nahiz eta Max Brissonek zortzi aurkari dauzkan,kontseilari nagusi karguaren galtzeko arriskutik urrun dago. Miarritze mendebaldeko kantonamenduan sorpresa gutxi espero da. Brissonek Miarritzeko Herriko Etxearen gehiengoaren sostengua dauka. Duela sei urte, oposizioko kidea zen, RPRen izenean aurkeztu zenean. Baina, lehen itzulian, Michel Veunac UDFkoari nagusitu zitzaion, nahiz eta hau Didier Borotra auzapezaren aldekoa izan. Aldi honetan Brisson kontseilari nagusi karguarekin eta UDF eta UMPren sostenguarekin doa.

Eskuineko kantonamendua da. Miarritze hiri erdiko eta kostaldeko kantonamendua da, gune turistikoena eta aberatsena. Biztanleen %35 erretretadunak dira eta bizilekuen %65 bigarren etxebizitzak dira. Horrek ere esplikatzen du zergatik duen eskuineko hauteslegoa. Azken kantonamendu hauteskundeetan, eskuineko hautagaiek, orotara, %70 boz bildu zituzten lehen itzulian.

Hori horrela izanik, Front Nationaleko hautagaiak %10 bat boz bederen ken dakizkiokeela kontuan harturik, lehen itzulitik %60ra hurbil daiteke. Bertze eskuineko hautagaia independentea da. Jean-François Zunzarren medikuak nolako eragina izan dezakeen jakitean dago lehen itzuliaren giltzaren zati bat. Bigarrena, abstentzioan. Abstentzio handiak eta Zunzarrenen emaitzek Max Brisson bigarren itzulian lehiatzera behar lezakete.

Aurtengo berritasun nagusia Elgar-ensemble-ek aurkezten duen hautagaia da. Philippe Etxeberri zinegotzi ohia da. Hautagai euskaltzale honek, ezkerrean edo eskuinean dagoen zehaztu gabe, bozak nori kenduko dizkion ikusi beharko da. Halaber, ikusi beharko da ea zer heinetarako babesa izanen duen. Abertzaleentzat nahiko zaila den kantonamenduan, espazio politiko guti gelditzen zaio. Gainerateko hautagai gehienak ez datoz bat departamenduaren eta euskararen ofizialtasunaren aldarrikapenekin.

Alderdi Sozialistako hautagaiak duela sei urte ez zeuzkan lehiakideak ere baditu. Berdeek hautagai bat aurkeztuko dute: François Madin. Bozak norbaiti kentzekotan, Labeguerieri kenduko dizkio. Ez da errana, ordea, anitz kenduko dizkiola. PRG alderdiko hautagaiak ere zenbait bil ditzake, gutxi bada ere.

Departamenduko gaiek baino leku gehiago dute Miarritzeko gaiek eta udal politikak. Max Brisonnen aurka aurkezten direnek kanpaina honekin udal gehiengoaren kudeaketa salatzen dute. Brissonek berak, alderantzizko argudioekin bada ere, kontseilari nagusiak hiriaren alde lan egiten eta egin behar duela dio. Kontseilari nagusia Kontseilu Nagusiaren eta auzapezaren aldekoa izatea Miarritzerentzat «eraginkorragoa» dela dio. Politika orokorreko gaiak kanpaina horretan sar daitezen begi txarrez ikusten du. Kontseilu Nagusiaren eskumenez baizik ez du mintzatu nahi.