'Poztariarena'

Guk ere Antillak zintzilik genituen argazkien paretetan, eta karta bat idaztea erabaki genuen norbaitek erantzun zezan. Ez genuen ezer eskatzen: udaberriko euritan larrosak noiz pizten hasiko zain geundela, horixe esaten genuen, ez besterik. Pasatu ziren hamar urte, pasatu zen mende erdi. Postariak gerra zaharretako lagun are zaharragoen albiste txarrak ekartzen zizkigun,mediku-txosten kezkagarriak, gure diruen miseria gorria. Gure gutunaren erantzunaganatik galdetzen genion guk. Postariak sorbaldak goratzen zituen. Bainillaren usainaren, piano-nota urrutien, ezpain bustien gustu aspaldikoaren oroitzapenari esker aldentzen genituen argazkiak kentzeko aitzakiak eta tentaldia, paretetako orbanak pintura berriz estaltzeko bulkada…

Atean jo dute. Postal bat luzatu digu postariak udaberriko euritan piztutako larrosa batzuen argazkiarekin. «Habanatik!». Batzuetan postariek badakite poztari izaten.