Komedianteak, komedianteak!, egiten genuen oihu ilunabarrean, eta herriko plazara jaisten ginen. Auskalo nondik etorriak, txisteak kontatzen zituzten, modako kantak kantatzen, txerpolari-lan eta malabarismoak egiten orduko kale-bonbilla apurren argi laburrean. Gure lilurak argitzen zuen bonbillek ezin zutena.
Komedianteak. Gure komeriak arintzen saiatzen diren aktoreak. Badira, ordea, antzerki-plazatik kanpo jarduten duten aktore trebe askoak. Badira, bai. Denok gara. Aktuatu, itxurak egin eta itxura eman, ez daukagun neurria erakusten saiatu kaleko bonbillen argitan. Hurkoa engainatzeko? Ez, zehazki. Garenaren eta izan nahi genukeenaren arteko distantzia laburtu nahi genuke eta txerpolari-bertigoa arindu. Kaleko argiak, apala izanagatik ere, ez dezala gure mundualdiko komeriaren baldarra salatu.
Komedianteak, komedianteak! Bonbillek argitu gabeko bazterrak gure lilurak distirarazten zituengarai joan haiek…
HITZ BESTE
Komedianteak
Iruzkinak
Ez dago iruzkinik
Ordenatu
